יהושע ט״ו
יהושע ט״ו, נוסח המסורה עם ניקוד: 63 הפסוקים של הפרק בטקסט מלא, בלי פרסומות ובלי הרשמה.
יהושע ט״ו במלואו
נוסח המסורה עם ניקוד, 63 פסוקים. לחצו על מראה מקום כדי לקשר ישירות לפסוק.
- יהו׳ ט״ו 1
וַיְהִי הַגּוֹרָל לְמַטֵּה בְּנֵי יְהוּדָה לְמִשְׁפְּחֹתָם אֶל־גְּבוּל אֱדוֹם מִדְבַּר־צִן נֶגְבָּה מִקְצֵה תֵימָן׃
- יהו׳ ט״ו 2
וַיְהִי לָהֶם גְּבוּל נֶגֶב מִקְצֵה יָם הַמֶּלַח מִן־הַלָּשֹׁן הַפֹּנֶה נֶגְבָּה׃
- יהו׳ ט״ו 3
וְיָצָא אֶל־מִנֶּגֶב לְמַעֲלֵה עַקְרַבִּים וְעָבַר צִנָה וְעָלָה מִנֶּגֶב לְקָדֵשׁ בַּרְנֵעַ וְעָבַר חֶצְרוֹן וְעָלָה אַדָּרָה וְנָסַב הַקַּרְקָעָה׃
- יהו׳ ט״ו 4
וְעָבַר עַצְמוֹנָה וְיָצָא נַחַל מִצְרַיִם וְהָיוּ תֹּצְאוֹת הַגְּבוּל יָמָּה זֶה־יִהְיֶה לָכֶם גְּבוּל נֶגֶב׃
- יהו׳ ט״ו 5
וּגְבוּל קֵדְמָה יָם הַמֶּלַח עַד־קְצֵה הַיַּרְדֵּן וּגְבוּל לִפְאַת צָפוֹנָה מִלְּשׁוֹן הַיָּם מִקְצֵה הַיַּרְדֵּן׃
- יהו׳ ט״ו 6
וְעָלָה הַגְּבוּל בֵּית חָגְלָה וְעָבַר מִצְּפוֹן לְבֵית הָעֲרָבָה וְעָלָה הַגְּבוּל אֶבֶן בֹּהַן בֶּן־רְאוּבֵן׃
- יהו׳ ט״ו 7
וְעָלָה הַגְּבוּל דְּבִרָה מֵעֵמֶק עָכוֹר וְצָפוֹנָה פֹּנֶה אֶל־הַגִּלְגָּל אֲשֶׁר־נֹכַח לְמַעֲלֵה אֲדֻמִּים אֲשֶׁר מִנֶּגֶב לַנָּחַל וְעָבַר הַגְּבוּל אֶל־מֵי־עֵין שֶׁמֶשׁ וְהָיוּ תֹצְאֹתָיו אֶל־עֵין רֹגֵל׃
- יהו׳ ט״ו 8
וְעָלָה הַגְּבוּל גֵּי בֶן־הִנֹּם אֶל־כֶּתֶף הַיְבוּסִי מִנֶּגֶב הִיא יְרוּשָׁלִָם וְעָלָה הַגְּבוּל אֶל־רֹאשׁ הָהָר אֲשֶׁר עַל־פְּנֵי גֵי־הִנֹּם יָמָּה אֲשֶׁר בִּקְצֵה עֵמֶק־רְפָאִים צָפֹנָה׃
- יהו׳ ט״ו 9
וְתָאַר הַגְּבוּל מֵרֹאשׁ הָהָר אֶל־מַעְיַן מֵי נֶפְתּוֹחַ וְיָצָא אֶל־עָרֵי הַר־עֶפְרוֹן וְתָאַר הַגְּבוּל בַּעֲלָה הִיא קִרְיַת יְעָרִים׃
- יהו׳ ט״ו 10
וְנָסַב הַגְּבוּל מִבַּעֲלָה יָמָּה אֶל־הַר שֵׂעִיר וְעָבַר אֶל־כֶּתֶף הַר־יְעָרִים מִצָּפוֹנָה הִיא כְסָלוֹן וְיָרַד בֵּית־שֶׁמֶשׁ וְעָבַר תִּמְנָה׃
- יהו׳ ט״ו 11
וְיָצָא הַגְּבוּל אֶל־כֶּתֶף עֶקְרוֹן צָפוֹנָה וְתָאַר הַגְּבוּל שִׁכְּרוֹנָה וְעָבַר הַר־הַבַּעֲלָה וְיָצָא יַבְנְאֵל וְהָיוּ תֹּצְאוֹת הַגְּבוּל יָמָּה׃
- יהו׳ ט״ו 12
וּגְבוּל יָם הַיָּמָּה הַגָּדוֹל וּגְבוּל זֶה גְּבוּל בְּנֵי־יְהוּדָה סָבִיב לְמִשְׁפְּחֹתָם׃
- יהו׳ ט״ו 13
וּלְכָלֵב בֶּן־יְפֻנֶּה נָתַן חֵלֶק בְּתוֹךְ בְּנֵי־יְהוּדָה אֶל־פִּי יְהוָה לִיהוֹשֻׁעַ אֶת־קִרְיַת אַרְבַּע אֲבִי הָעֲנָק הִיא חֶבְרוֹן׃
- יהו׳ ט״ו 14
וַיֹּרֶשׁ מִשָּׁם כָּלֵב אֶת־שְׁלוֹשָׁה בְּנֵי הָעֲנָק אֶת־שֵׁשַׁי וְאֶת־אֲחִימַן וְאֶת־תַּלְמַי יְלִידֵי הָעֲנָק׃
- יהו׳ ט״ו 15
וַיַּעַל מִשָּׁם אֶל־יֹשְׁבֵי דְּבִר וְשֵׁם־דְּבִר לְפָנִים קִרְיַת־סֵפֶר׃
- יהו׳ ט״ו 16
וַיֹּאמֶר כָּלֵב אֲשֶׁר־יַכֶּה אֶת־קִרְיַת־סֵפֶר וּלְכָדָהּ וְנָתַתִּי לוֹ אֶת־עַכְסָה בִתִּי לְאִשָּׁה׃
- יהו׳ ט״ו 17
וַיִּלְכְּדָהּ עָתְנִיאֵל בֶּן־קְנַז אֲחִי כָלֵב וַיִּתֶּן־לוֹ אֶת־עַכְסָה בִתּוֹ לְאִשָּׁה׃
- יהו׳ ט״ו 18
וַיְהִי בְּבוֹאָהּ וַתְּסִיתֵהוּ לִשְׁאוֹל מֵאֵת־אָבִיהָ שָׂדֶה וַתִּצְנַח מֵעַל הַחֲמוֹר וַיֹּאמֶר־לָהּ כָּלֵב מַה־לָּךְ׃
- יהו׳ ט״ו 19
וַתֹּאמֶר תְּנָה־לִּי בְרָכָה כִּי אֶרֶץ הַנֶּגֶב נְתַתָּנִי וְנָתַתָּה לִי גֻּלֹּת מָיִם וַיִּתֶּן־לָהּ אֵת גֻּלֹּת עִלִּיּוֹת וְאֵת גֻּלֹּת תַּחְתִּיּוֹת׃
- יהו׳ ט״ו 20
זֹאת נַחֲלַת מַטֵּה בְנֵי־יְהוּדָה לְמִשְׁפְּחֹתָם׃
- יהו׳ ט״ו 21
וַיִּהְיוּ הֶעָרִים מִקְצֵה לְמַטֵּה בְנֵי־יְהוּדָה אֶל־גְּבוּל אֱדוֹם בַּנֶּגְבָּה קַבְצְאֵל וְעֵדֶר וְיָגוּר׃
- יהו׳ ט״ו 22
וְקִינָה וְדִימוֹנָה וְעַדְעָדָה׃
- יהו׳ ט״ו 23
וְקֶדֶשׁ וְחָצוֹר וְיִתְנָן׃
- יהו׳ ט״ו 24
זִיף וָטֶלֶם וּבְעָלוֹת׃
- יהו׳ ט״ו 25
וְחָצוֹר חֲדַתָּה וּקְרִיּוֹת חֶצְרוֹן הִיא חָצוֹר׃
- יהו׳ ט״ו 26
אֲמָם וּשְׁמַע וּמוֹלָדָה׃
- יהו׳ ט״ו 27
וַחֲצַר גַּדָּה וְחֶשְׁמוֹן וּבֵית פָּלֶט׃
- יהו׳ ט״ו 28
וַחֲצַר שׁוּעָל וּבְאֵר שֶׁבַע וּבִזְיוֹתְיָה׃
- יהו׳ ט״ו 29
בַּעֲלָה וְעִיִּים וָעָצֶם׃
- יהו׳ ט״ו 30
וְאֶלְתּוֹלַד וּכְסִיל וְחָרְמָה׃
- יהו׳ ט״ו 31
וְצִקְלַג וּמַדְמַנָּה וְסַנְסַנָּה׃
- יהו׳ ט״ו 32
וּלְבָאוֹת וְשִׁלְחִים וְעַיִן וְרִמּוֹן כָּל־עָרִים עֶשְׂרִים וָתֵשַׁע וְחַצְרֵיהֶן׃
- יהו׳ ט״ו 33
בַּשְּׁפֵלָה אֶשְׁתָּאוֹל וְצָרְעָה וְאַשְׁנָה׃
- יהו׳ ט״ו 34
וְזָנוֹחַ וְעֵין גַּנִּים תַּפּוּחַ וְהָעֵינָם׃
- יהו׳ ט״ו 35
יַרְמוּת וַעֲדֻלָּם שׂוֹכֹה וַעֲזֵקָה׃
- יהו׳ ט״ו 36
וְשַׁעֲרַיִם וַעֲדִיתַיִם וְהַגְּדֵרָה וּגְדֵרֹתָיִם עָרִים אַרְבַּע־עֶשְׂרֵה וְחַצְרֵיהֶן׃
- יהו׳ ט״ו 37
צְנָן וַחֲדָשָׁה וּמִגְדַּל־גָּד׃
- יהו׳ ט״ו 38
וְדִלְעָן וְהַמִּצְפֶּה וְיָקְתְאֵל׃
- יהו׳ ט״ו 39
לָכִישׁ וּבָצְקַת וְעֶגְלוֹן׃
- יהו׳ ט״ו 40
וְכַבּוֹן וְלַחְמָס וְכִתְלִישׁ׃
- יהו׳ ט״ו 41
וּגְדֵרוֹת בֵּית־דָּגוֹן וְנַעֲמָה וּמַקֵּדָה עָרִים שֵׁשׁ־עֶשְׂרֵה וְחַצְרֵיהֶן׃
- יהו׳ ט״ו 42
לִבְנָה וָעֶתֶר וְעָשָׁן׃
- יהו׳ ט״ו 43
וְיִפְתָּח וְאַשְׁנָה וּנְצִיב׃
- יהו׳ ט״ו 44
וּקְעִילָה וְאַכְזִיב וּמָרֵאשָׁה עָרִים תֵּשַׁע וְחַצְרֵיהֶן׃
- יהו׳ ט״ו 45
עֶקְרוֹן וּבְנֹתֶיהָ וַחֲצֵרֶיהָ׃
- יהו׳ ט״ו 46
מֵעֶקְרוֹן וָיָמָּה כֹּל אֲשֶׁר־עַל־יַד אַשְׁדּוֹד וְחַצְרֵיהֶן׃
- יהו׳ ט״ו 47
אַשְׁדּוֹד בְּנוֹתֶיהָ וַחֲצֵרֶיהָ עַזָּה בְּנוֹתֶיהָ וַחֲצֵרֶיהָ עַד־נַחַל מִצְרָיִם וְהַיָּם הַגָּדוֹל וּגְבוּל׃
- יהו׳ ט״ו 48
וּבָהָר שָׁמִיר וְיַתִּיר וְשׂוֹכֹה׃
- יהו׳ ט״ו 49
וְדַנָּה וְקִרְיַת־סַנָּה הִיא דְבִר׃
- יהו׳ ט״ו 50
וַעֲנָב וְאֶשְׁתְּמֹה וְעָנִים׃
- יהו׳ ט״ו 51
וְגֹשֶׁן וְחֹלֹן וְגִלֹה עָרִים אַחַת־עֶשְׂרֵה וְחַצְרֵיהֶן׃
- יהו׳ ט״ו 52
אֲרַב וְרוּמָה וְאֶשְׁעָן׃
- יהו׳ ט״ו 53
וְיָנוּם וּבֵית־תַּפּוּחַ וַאֲפֵקָה׃
- יהו׳ ט״ו 54
וְחֻמְטָה וְקִרְיַת אַרְבַּע הִיא חֶבְרוֹן וְצִיעֹר עָרִים תֵּשַׁע וְחַצְרֵיהֶן׃
- יהו׳ ט״ו 55
מָעוֹן כַּרְמֶל וָזִיף וְיוּטָּה׃
- יהו׳ ט״ו 56
וְיִזְרְעֶאל וְיָקְדְעָם וְזָנוֹחַ׃
- יהו׳ ט״ו 57
הַקַּיִן גִּבְעָה וְתִמְנָה עָרִים עֶשֶׂר וְחַצְרֵיהֶן׃
- יהו׳ ט״ו 58
חַלְחוּל בֵּית־צוּר וּגְדוֹר׃
- יהו׳ ט״ו 59
וּמַעֲרָת וּבֵית־עֲנוֹת וְאֶלְתְּקֹן עָרִים שֵׁשׁ וְחַצְרֵיהֶן׃
- יהו׳ ט״ו 60
קִרְיַת־בַּעַל הִיא קִרְיַת יְעָרִים וְהָרַבָּה עָרִים שְׁתַּיִם וְחַצְרֵיהֶן׃
- יהו׳ ט״ו 61
בַּמִּדְבָּר בֵּית הָעֲרָבָה מִדִּין וּסְכָכָה׃
- יהו׳ ט״ו 62
וְהַנִּבְשָׁן וְעִיר־הַמֶּלַח וְעֵין גֶּדִי עָרִים שֵׁשׁ וְחַצְרֵיהֶן׃
- יהו׳ ט״ו 63
וְאֶת־הַיְבוּסִי יוֹשְׁבֵי יְרוּשָׁלִַם לֹא־יָכְלוּ בְנֵי־יְהוּדָה לְהוֹרִישָׁם וַיֵּשֶׁב הַיְבוּסִי אֶת־בְּנֵי יְהוּדָה בִּירוּשָׁלִַם עַד הַיּוֹם הַזֶּה׃
יהושע: 24 הפרקים
לכל פרק יש עמוד משלו, עם הטקסט המלא.
המשיכו לקרוא
הפרק יהושע ט״ו שייך לספר יהושע, השישי מבין 66 ספרי כתבי הקודש (נוסח המסורה עם ניקוד). קראו את 24 הפרקים לפי הסדר, או חפשו מילה ב־66 הספרים.