תסלוניקים א׳ ה׳

תסלוניקים א׳ ה׳ במלואו

תרגום דליטש עם ניקוד, 28 פסוקים. לחצו על מראה מקום כדי לקשר ישירות לפסוק.

1. תס״א ה׳ 1

   וְעַל־דְּבַר הָעִתִּים וְהַזְּמַנִּים אֵין־צֹרֶךְ לִכְתֹּב אֲלֵיכֶם אֶחָי׃

2. תס״א ה׳ 2

   הֲלֹא אַף־אַתֶּם יְדַעְתֶּם הֵיטֵב כִּי יוֹם־יְהוָֹה כַּגַּנָּב בַּלַּיְלָה כֵּן יָבוֹא׃

3. תס״א ה׳ 3

   כִּי בְאָמְרָם שָׁלוֹם וְשַׁלְוָה יָבֹא עֲלֵיהֶם הַשֶּׁבֶר פִּתְאֹם כְּחֶבְלֵי יוֹלֵדָה וְלֹא יוּכְלוּ הִמָּלֵט׃

4. תס״א ה׳ 4

   אֲבָל אַתֶּם אַחַי לֹא בַּחשֶׁךְ אַתֶּם שֶׁיַּשִׂיג אֶתְכֶם הַיּוֹם כַּגַּנָּב׃

5. תס״א ה׳ 5

   אַתֶּם כֻּלְּכֶם בְּנֵי הָאוֹר וּבְנֵי הַיּוֹם לֹא בְנֵי־הַלַּיְלָה אֲנַחְנוּ וְלֹא בְּנֵי הַחשֶׁךְ׃

6. תס״א ה׳ 6

   לָכֵן אַל־נָא נֵרָדֵם כְּמוֹ הָאֲחֵרִים כִּי אִם־נִשְׁקֹד וְנִהְיֶה ְמְפֻכָּחִים׃

7. תס״א ה׳ 7

   כִּי הַנִּרְדָּמִים נִרְדָּמִים בַּלָּיְלָה וְהַמִּשְׁתַּכְּרִים מִשְׁתַּכְּרִים בַּלָּיְלָה׃

8. תס״א ה׳ 8

   וַאֲנַחְנוּ בְּנֵי הַיּוֹם נִתְּפַּכֵּחַ־נָּא וְנִלְבַּשׁ אֶת־שִׁרְיוֹן הָאֱמוּנָה וְהָאַהֲבָה וְכַכּוֹבַע אֶת־תִּקְוַת הַיְשׁוּעָה׃

9. תס״א ה׳ 9

   יַעַן אֲשֶׁר לֹא־יְעָדָנוּ הָאֱלֹהִים לְחָרוֹן כִּי לָרֶשֶׁת אֶת־הַיְשׁוּעָה עַל־יְדֵי אֲדֹנֵינוּ יֵשׁוּעַ הַמָּשִׁיחַ׃

10. תס״א ה׳ 10

    אֲשֶׁר מֵת בַּעֲדֵנוּ לְמַעַן נִחְיֶה עִמּוֹ יָחַד אִם־נִשְׁקֹד וְאִם־נִישָׁן׃

11. תס״א ה׳ 11

    עַל־כֵּן נַחֲמוּ זֶה אֶת־זֶה וּבְנוּ אִישׁ אֶת־אָחִיו כַּאֲשֶׁר עֲשִׂיתֶם׃

12. תס״א ה׳ 12

    וְהִנְנוּ מְבַקְשִׁים מִכֶּם אַחַי לְהַכִּיר אֶת־הָעֲמֵלִים בָּכֶם וְאֵת הַנִּצָּבִים עֲלֵיכֶם בִּדְבַר הָאָדוֹן וּמוֹכִיחִים אֶתְכֶם׃

13. תס״א ה׳ 13

    וְתִנְהֲגוּ־בָם כָּבוֹד גָּדוֹל מְאֹד בְּאַהֲבָה לְמַעַן פְּעֻלָּתָם וִיהִי שָׁלוֹם בֵּינֵיכֶם׃

14. תס״א ה׳ 14

    וְהִנְנוּ מַזְהִירִים אֶתְכֶם אֶחָי הוֹכִיחוּ אֶת־הַמְעַקְּשִׁים דַּרְכֵיהֶם אַמְּצוּ אֶת־רַכֵּי הַלֵּבָב תִּמְכוּ אֶת־הַחַלָּשִׁים וְהַאֲרִיכוּ רוּחַ אֶל־כָּל־אָדָם׃

15. תס״א ה׳ 15

    וּרְאוּ פֶּן־יְשַׁלֵּם אִישׁ לְרֵעֵהוּ רָעָה תַּחַת רָעָה כִּי אִם־רִדְפוּ בְּכָל־עֵת אֶת־הַטּוֹב הֵן לְאִישׁ אִישׁ מִכֶּם הֵן לְכָל־אָדָם׃

16. תס״א ה׳ 16

    שִׂמְחוּ בְּכָל־עֵת׃

17. תס״א ה׳ 17

    הִתְפַּלְּלוּ כָּל־הַיּוֹם׃

18. תס״א ה׳ 18

    הוֹדוּ עַל־הַכֹּל כִּי־זֶה רְצוֹן אֱלֹהִים בַּמָּשִׁיחַ יֵשׁוּעַ אֲלֵיכֶם׃

19. תס״א ה׳ 19

    אֶת־הָרוּחַ לֹא תְּכַבּוּ׃

20. תס״א ה׳ 20

    אֶת־הַנְּבוּאוֹת לֹא תִמְאָסוּ׃

21. תס״א ה׳ 21

    בַּחֲנוּ כָּל־דָּבָר וּבַטּוֹב אֱחֹזוּ׃

22. תס״א ה׳ 22

    הִתְרַחֲקוּ מִכָּל־הַדּוֹמֶה לָרָע׃

23. תס״א ה׳ 23

    וֵאלֹהֵי הַשָּׁלוֹם הוּא יְקַדֵּשׁ אֶתְכֶם בִּקְדֻשָּׁה שְׁלֵמָה וְכָל־רוּחֲכֶם וְנַפְשְׁכֶם וְגוּפְכֶם יִשָּׁמֵר תָּמִים בְּבוֹא אֲדֹנֵינוּ יֵשׁוּעַ הַמָּשִׁיחַ׃

24. תס״א ה׳ 24

    נֶאֱמָן הוּא הַקּוֹרֵא אֶתְכֶם אֲשֶׁר גַּם־יַעֲשֶׂה׃

25. תס״א ה׳ 25

    אַחַי הִתְפַּלֲלוּ בַעֲדֵנוּ׃

26. תס״א ה׳ 26

    שַׁאֲלוּ לִשְׁלוֹם כָּל־הָאַחִים בַּנְּשִׁיקָה הַקְּדשָׁה׃

27. תס״א ה׳ 27

    הִנְנִי מַשְׁבִּיעֲכֶם בָּאָדוֹן אֲשֶׁר תִּקָּרֵא הָאִגֶּרֶת הַזֹּאת בְּאָזְנֵי כָּל־הָאַחִים (הַקְּדשִׁים)׃

28. תס״א ה׳ 28

    חֶסֶד יֵשׁוּעַ הַמָּשִׁיחַ אֲדֹנֵינוּ עִמָּכֶם אָמֵן׃

המשיכו לקרוא

הפרק תסלוניקים א׳ ה׳ שייך לספר תסלוניקים א׳, ה־52 מבין 66 ספרי כתבי הקודש (תרגום דליטש עם ניקוד). קראו את 5 הפרקים לפי הסדר, או חפשו מילה ב־66 הספרים.