Ohabolana 13

Ohabolana 13 — ny soratra feno

Baiboly (1865), andininy 25. Tsindrio ny isan'ny andininy raha te-ho eo amin'io andininy io mivantana ianao.

1. Oha 13:1

   Ny zanaka hendry mihaino ny fananaran-drainy; Fa ny mpaniratsira tsy mety mihaino, na dia anarina mafy aza.

2. Oha 13:2

   Ny vokatry ny vavan’ ny olona no ahazoany soa; Fa ny hampidi-doza no mahafaly ny mpivadika.

3. Oha 13:3

   Izay mahambim-bava no miaro ny ainy; Fa izay vavàna dia haringana.

4. Oha 13:4

   Ny fanahin’ ny kamo maniry, fa tsy mba mahazo; Fa ny fanahin’ ny mazoto hohatavezina.

5. Oha 13:5

   Ny lainga dia halan’ ny marina; Fa ny ratsy fanahy manao izay maharikoriko sy mahamenatra.

6. Oha 13:6

   Ny fahamarinana miaro izay mandeha tsy misy tsiny; Fa ny haratsiana mamotraka ny mpanota.

7. Oha 13:7

   Misy mihambo ho manan-karena, nefa tsy manana na inona na inona; Misy kosa mody malahelo, nefa manana harena be.

8. Oha 13:8

   Ny haren’ ny olona dia avotry ny ainy; Fa ny levilevy tsy mampiraika ny malahelo akory.

9. Oha 13:9

   Ny fahazavan’ ny marina dia tsara firehitra; Fa ny jiron’ ny ratsy fanahy ho faty.

10. Oha 13:10

    Fifandirana ihany no vokatry ny fiavonavonana; Fa ao amin’ ny mino anatra no misy fahendrena.

11. Oha 13:11

    Ny harena azoazo foana dia mihena lalandava; Fa izay mahavatra mitsimpona no mampitombo.

12. Oha 13:12

    Ny fanantenana tsy azo vetivety dia mankarary am-bavafo; Fa hazon’ aina ny faniriana tanteraka.

13. Oha 13:13

    Izay manamavo ny teny ho voasingony; Fa izay matahotra ny didy no hahazo valim-pitia.

14. Oha 13:14

    Ny fampianaran’ ny hendry dia loharanon’ aina Ka mampivily tsy ho ao amin’ ny fandriky ny fahafatesana.

15. Oha 13:15

    Ny fahendrena tsara dia ahazoam-pitia; Fa sarotra ny lalan’ ny mpivadika.

16. Oha 13:16

    Ny mahira-tsaina, rehetra miasa amin’ ny fahalalana; Fa ny adala kosa mampiseho hadalana;

17. Oha 13:17

    Ny iraka ratsy fanahy idiran-doza; Fa ny iraka mahatoky dia famelombelomana.

18. Oha 13:18

    Fahalahelovana sy henatra no ho an’ izay mandà famaizana; Fa izay manaiky anatra no homem-boninahitra.

19. Oha 13:19

    Mamin’ ny fo ny faniriana tanteraka; Fa fahavetavetana eo imason’ ny adala ny hiala amin’ ny ratsy.

20. Oha 13:20

    Izay miara-dia amin’ ny hendry dia ho hendry; Fa izay misakaiza amin’ ny adala dia hidiran-doza.

21. Oha 13:21

    Ny mpanota dia enjehin’ ny loza: Fa hovalian-tsoa ny marina.

22. Oha 13:22

    Ny tsara fanahy mahenina lova ny zafiny, Fa ny haren’ ny mpanota kosa voatahiry ho an’ ny marina.

23. Oha 13:23

    Ny tanin’ ny malahelo izay voasa dia ahazoana hanina be; Fa maro no ringana noho ny fanaovan’ izay tsy rariny.

24. Oha 13:24

    Izay mitsitsy ny tsorakazony dia tsy tia ny zanany; Fa izay tia zanaka dia manafay azy, raha mbola kely.

25. Oha 13:25

    Ny marina mihinana ka voky tsara; Fa noana ny kibon’ ny ratsy fanahy.

Hanohy mamaky

Ny Ohabolana 13 dia iray amin'ny toko 31 ao amin'ny bokin'ny Ohabolana, boky faha-20 amin'ny boky 66 ao amin'ny Baiboly (1865). Azonao vakina mifanarakaraka ny toko, na karohina ny teny ao amin'ny boky 66 rehetra.