Joba 20

Joba 20 — ny soratra feno

Baiboly (1865), andininy 29. Tsindrio ny isan'ny andininy raha te-ho eo amin'io andininy io mivantana ianao.

1. Joba 20:1

   Dia namaly Zofara Namatita ka nanao hoe:

2. Joba 20:2

   Noho izany dia mamaly ahy ny eritreritro, eny, noho ny fihetsiketsiky ny saiko.

3. Joba 20:3

   Reko lalandava ny anatra mampahamenatra ahy; Ary ny fanahiko mamaly ahy avy amin’ ny fahalalako.

4. Joba 20:4

   Tsy fantatrao va fa hatramin’ ny ela, eny, hatrizay nampitoerana ny olona tetỳ ambonin’ ny tany,

5. Joba 20:5

   Dia vetivety foana ny firavoravoan’ ny ratsy fanahy, ary indray mipi-maso monja ny fifalian’ ny mpihatsaravelatsihy?

6. Joba 20:6

   Fa na dia mipaka amin’ ny lanitra aza ny hahavony, ka mitehika amin’ ny rahona ny lohany,

7. Joba 20:7

   Dia ho very mandrakizay toy ny dikiny ihany izy; Izay nahita azy dia hanao hoe: Aiza izy?

8. Joba 20:8

   Manidina tahaka ny nofy izy ka tsy ho hita; Eny, ampandosirina tahaka ny tsindrimandry amin’ ny alina izy.

9. Joba 20:9

   Ny maso izay mijery, dia indray mitopy ihany no ahitany azy; Ary dia tsy hahita azy intsony ny fitoerany.

10. Joba 20:10

    Ny zanany hitambitamby amin’ ny malahelo, ary ny tànany ihany no hampody ny hareny.

11. Joba 20:11

    Ny taolany dia feno ny herin’ ny fahatanorana, Nefa hiara-mandry aminy eo amin’ ny vovoka izany.

12. Joba 20:12

    Na dia mamy ao am-bavany aza ny ratsy, ka afeniny ao ambanin’ ny lelany,

13. Joba 20:13

    Ary tsitsiny ka tsy foiny, fa tehiriziny ao amin’ ny lanilaniny ihany,

14. Joba 20:14

    Dia miova ny haniny ao an-kibony, ka aferon’ ny vipera no ao anatiny.

15. Joba 20:15

    Harena no nateliny, nefa aloany indray; Loaran’ Andriamanitra hiala ao an-kibony izany.

16. Joba 20:16

    Ny poizin’ ny vipera no hotsentsefiny; Hahafaty azy ny lelan’ ny menarana.

17. Joba 20:17

    Tsy ho faly mahita renirano izy, dia ony sy riaky ny tantely sy ronono.

18. Joba 20:18

    Tsy azony atelina izay nikelezany aina, fa tsy maintsy hampodiny; Na dia be aza ny hareny, dia tsy ho araka izany ny hafaliany.

19. Joba 20:19

    Fa nampahory sy nahafoy ny reraka izy ka naka trano an-keriny, fa tsy hahatontosa azy.

20. Joba 20:20

    Satria tsy mahalala mionona ny kibony, dia tsy hahavonjy ny tenany mbamin’ ny tiany indrindra izy.

21. Joba 20:21

    Tsy misy tsy tratry ny fieremany; Ka dia tsy haharitra ny fiadanany.

22. Joba 20:22

    Ho poriporitra izy, na dia mihoa-pampana aza ny fananany; Ny tanan’ ny ory no hamely azy.

23. Joba 20:23

    Halefan’ Andriamanitra ny fahatezerany mirehitra hameno ny kibony; Eny, halatsany aminy toy ny ranonorana izany ho hanina ho azy.

24. Joba 20:24

    Raha mandositra ny vy fiadiana izy, dia hahavoa azy miboroaka ny tsipìka varahina;

25. Joba 20:25

    Tsoahany izany, ka mivoaka avy amin’ ny tenany; Eny, ny manelatselatra dia mivoaka avy amin’ ny aferony; Lasa izy azon’ ny fahatahorana mafy.

26. Joba 20:26

    Ny aizim-pito no voarakitra ho amin’ ny raki-malalany; Afo tsy tsofina no handoro azy sady handevona izay sisa ao amin’ ny lainy.

27. Joba 20:27

    Hambaran’ ny lanitra ny helony, Ary ny tany hitsangana hiampanga azy,

28. Joba 20:28

    Ho lasa ny harena tafiditra ao an-tranony; Eny, ho levona izany amin’ ny andro fahatezerany.

29. Joba 20:29

    Izany no anjaran’ ny ratsy fanahy avy amin’ Andriamanitra, sy lova voatendrin’ Andriamanitra ho azy.

Hanohy mamaky

Ny Joba 20 dia iray amin'ny toko 42 ao amin'ny bokin'ny Joba, boky faha-18 amin'ny boky 66 ao amin'ny Baiboly (1865). Azonao vakina mifanarakaraka ny toko, na karohina ny teny ao amin'ny boky 66 rehetra.