Salamo 50

Salamo 50 — ny soratra feno

Baiboly (1865), andininy 23. Tsindrio ny isan'ny andininy raha te-ho eo amin'io andininy io mivantana ianao.

1. Sal 50:1

   Salamo nataon i Asafa. Andriamanitra Andriananahary, dia Jehovah, no miteny ka miantso ny tany hatramin’ ny fiposahan’ ny masoandro ka hatramin’ ny filentehany.

2. Sal 50:2

   Avy ao Ziona, izay tena fahatsaran-tarehy, no amirapiratan’ Andriamanitra.

3. Sal 50:3

   Avy Andriamanitsika ka tsy hangina; afo no mandevona eo alohany, ary tafio-drivotra mahery no manodidina Azy.

4. Sal 50:4

   Miantso ny lanitra any ambony Izy, sy ny tany koa, mba hitsaràny ny olony:

5. Sal 50:5

   Angony etỳ amiko ny oloko masìna izay manao fanekena amiko amin’ ny fanatitra.

6. Sal 50:6

   Hasehon’ ny lanitra ny fahamarinany; fa Andriamanitra no Mpitsara. [Sela.]

7. Sal 50:7

   Mihainoa, ry oloko, fa hiteny Aho; Ry Isiraely ô, fa hanambara aminao Aho; Izaho no Andriamanitra, dia Andriamanitrao.

8. Sal 50:8

   Tsy ny fanatitrao no ananarako anao, ary efa eo anatrehako mandrakariva ny fanatitra doranao.

9. Sal 50:9

   Tsy maka vantotr’ ombilahy amin’ ny tranonao Aho, na osilahy amin’ ny valanao;

10. Sal 50:10

    Fa Ahy ny biby rehetra any an’ ala, sy ny biby fiompy arivoarivo eny an-tendrombohitra.

11. Sal 50:11

    Fantatro ny vorona rehetra eny an-tendrombohitra; ary eto amiko ny zava-mihetsiketsika eny an-tsaha.

12. Sal 50:12

    Raha mba noana Aho, dia tsy hilaza aminao; fa Ahy izao tontolo izao sy izay rehetra eo aminy.

13. Sal 50:13

    Hihinana ny nofon’ ombilahy va Aho, na hisotro ny ran’ osilahy?

14. Sal 50:14

    Manatera fanati-pisaorana ho an’ Andriamanitra; ary efao amin’ ny Avo Indrindra ny voadinao;

15. Sal 50:15

    Antsoy Aho amin’ ny andro fahoriana, dia hamonjy anao Aho, ka hanome voninahitra Ahy ianao.

16. Sal 50:16

    Fa amin’ ny ratsy fanahy kosa dia hoy Andriamanitra: ahoana no itorianao ny lalàko sy itondranao ny fanekeko eo am-bavanao?

17. Sal 50:17

    Fa ianao mankahala fananarana, ary arianao eo ivohonao ny teniko.

18. Sal 50:18

    Raha mahita mpangalatra ianao, dia faly hikambana aminy, ary miray anjara amin’ ny mpijangajanga.

19. Sal 50:19

    Ny vavanao alefanao hiteny ratsy, ary ny lelanao mamorom-pitaka.

20. Sal 50:20

    Mipetraka miteny ratsy ny rahalahinao ianao, sady manendrikendrika ny zanakalahin-dreninao.

21. Sal 50:21

    Izany no nataonao, nefa nangina ihany Aho, ka dia nataonao fa mitovy aminao ihany Aho! Hananatra anao Aho ka handahatra izany eo imasonao.

22. Sal 50:22

    Mihevera izany ankehitriny, ianareo izay manadino an’ Andriamanitra, fandrao hamiravira Aho, ka tsy hisy hamonjy.

23. Sal 50:23

    Izay manatitra fanati-pisaorana no manome voninahitra Ahy; ary izay mitandrina ny lalany no hanehoako ny famonjen’ Andriamanitra.

Hanohy mamaky

Ny Salamo 50 dia iray amin'ny hira 150 ao amin'ny bokin'ny Salamo, boky faha-19 amin'ny boky 66 ao amin'ny Baiboly (1865). Azonao vakina mifanarakaraka izy ireo, na karohina ny teny ao amin'ny boky 66 rehetra.